ပုံမှန်ခြီလှမ်းချေနန့် လမ်းမကြီးတတည့်လျှောက်လာရေ မြတ်ပန်း ခြီလှမ်းတိ ဇာကြောင့်ရပ်ချချင် ဖြစ်လားရလေ။ ပြုံ့လို့လာရေမြတ်ပန်း နှုတ်ခမ်းတိ…အင့်ချင်းအလှတိဆိတ်သုန်းလားရေ။ နဂိုအတိုင်းတောက်ပနီရေ မျက်လုံးတိ မျက်သားတရိပ်ရိပ်နန့် ညှိုးငယ်လားစော်က သသိသသာ။
“သူ”…………..
ကျောင်းရှိ ဘတ်စ်ကားဂိတ်ကသားသစ်ခုံချေမှာ သူထိုင်နီပြန်ဗျလ်။ ၀ထုတ်ချေငိုက်ပနာဆောင်းလို့ ဂျိမ်းဘောင်းဘီအရောင်စစို ပပွချေကို အစိမ်းရောင်စပို့ရှပ် နန့်ဂျာကင်အညိုချေထပ်ဝတ်ထားစော်က သေသပ်သယောင် မသေသပ်သယောင်။ စီးထားရေဘုတ်ဖိနပ်ကလေ့ အံဝင်ဂွင်ကျ ဖြစ်အောင်ပင် ဘောင်းဘီအောက်နားစချေကို အဖြည့်ခံထားရေ။ ဖြူနုနီရေလက်ချေနှစ်ဖက်က စာအုပ်တအုပ်ကို လိပ်ဗျာ..ကစပ်နီရေ။
စောင်းလို့ကြည့်လာရေ မျက်ဝန်းအစုံကြောင့်မြတ်ပန်း မျက်လွှာကိုအားဓမချဗနာ ကျောင်းအဆောက်အအုံ နံပါတ်(၁၁)၊ Building-11ကို ဦးတည်းလားနီရေ။ ပူနီရေနီရောင်အောက်မှာ ထီးဆောင်းဖို့မိန့်နီရေ။ မြတ်ပန်းနောက်မှာ ကပ်ပါလာဖို့ မလာဖို့ မသေချာရေ အကြည့်တစ်စုံ နန့်မြတ်ပန်း ထပ်လို့ ဆုံချင်သိရေ။
“ဒေနိ့ သူ့……..ကိုတွီ့စော်တပတ်မြောက်လားဗျလ်။”
စာသင်ခန်းထဲမှာဟိရေနီမြတ်ပန်း သူမစိတ်တိဇာရောက်လို့ရောက်နီမှန်းသတိမထားမိ။
++++
ပွီ…ပွီမ်..၀ူး….၀ူး…….တီ..တီ..
ကျောင်းဆင်းချိန်ဖြစ်လို့ ကျောင်းသားတိလေ့ရှုပ်ချခတ်လို့။ ကားတိဆိုင်ကယ်တိကိုလေ့ မနည်းကြည့်လားနီရရေ။ ကျောင်းရှိက street market ကိုကြည့်လိုက်ကေ ဒေအချိန် လူပွဲရေလို့မဟိ။…စာအုပ်ချေတိကိုပိုက်လို့ မြတ် ပန်း ညညင်သသာချေ ပြုံးလိုက်တေ။ မျက်လုံးချေကိုပင့်လို့ထိုဖက်ဒေဖက်အကြည့်မှာ……ထော…..
ဆံပင်ရှည် မချေတယောက်ကိုကျော်လို့ကြည့်လာရေ မျက်လုံးတစုံနန့် တတည့်ကျလာရေ မြတ်ပန်းမျက်ဝန်းတစုံကြားမှာ မြတ်ပန်း အရှုံးပီးဂေါင်းငုံ့လိုက်ရရေ။
“သူ……..ရယ်နီဖို့ထင်ရေ။ သူ……..မြတ်ပန်းကိုနားမလည်ရေအကြည့်တိနန့်ကြည့်နီဖို့ထင်ရေ။”
ဒေပိုင်မြင်ကွင်းမျိုး…ဒေပိုင်အကြည့်မျိုး..ဒေပိုင်ညနီခင်း…ဒေပိုင်မိုးသောက်ဖက်တိနန့် ဒေကားဂိတ်ကိုမြတ်ပန်း စိတ်အလိုလိုက်ပနာ ဖြတ်လားဖြတ်လာလုပ်နီမိရေ။မြင်နီကျသူ့ကို…မြတ်ပန်းတွီ့ချင်ရေ။မြင်ရတိုင်းဖြစ်လာရေ ၀မ်းနည်းစိတ်ကို သူရိပ်မိလားဗျလ်လာ။ ဆုံလိုက်တိုင်းဖြစ်ပေါ်လာရေ မျက်နှာနနွမ်းချေကို သူအရိပ်ကျလားဗျလ်လား။ မြတ်ပန်းပုံစံက သနားစရာဖြစ်လားဗျလ်လား။ ချီတုံချတုံဖြစ်နီရေ ခြီလှမ်းတိကိုသူ..ရယ်ချင်နီဗျလ်လား။
မြတ်ပန်းနှုတ်ခမ်းချေကိုစိဗျလ် မျက်စိမှိတ်လမ်းလျှောက်လိုက်တေ။……….
“ငါ့ခြီလှမ်းတိ ငါ့ခြီလှမ်းတိ..သူ့ကိုအလျင်ကျော်လားပါစီ ကျော်လားပါစီ။”
++++
“အင့်……………..အား”…….
မြတ်ပန်း ပစအဟောင်းသားနန့်……..မျက်တောင်မခတ်ပဲ မျက်စိတိသူ့ဘားရောက်လားရေ။ စတွီ့ရေနိကပင် ဒေလောက်ရရဲ၀၀ံ့ကြည့်မိကေ ကောင်းလှရေ သူ့အလှကိုဒေထက်ပိုရိပ်မိဖို့..ခံစားမိဖို့..။ တယောက်ယောက်နန့်ဆင်တူနီရေဒေအလှကို အိမ်မက်ထဲအထိခေါ်လိုက်မိဖို့။
“ဆောရီးပါ..အစ်မ..တောင်းပန်ပါရေ။”
အသံချေတိ…အသံချေတိ..အယင့်အယင်နှစ်တိက ငါကြားဖူးရေအသံမျိုး။ ကြည့်စမ်း နဖူးတိလေ့တတူဗျလ်။ ဒေနဖူးတိ ၀ထုတ်ချွတ်ထားမှမြင်လိုက်ရရေ။
“အိုး….မောင်…နာလားလာ..ဇာဖြစ်ခလေ..ပြဗလင်။”
“ရရေ ခိုင်…ငါတခုလေ့မဖြစ်..ဒေအစ်မရာ နာလားလာမသိ…”။
အသံပိုရှင်ကိုမြတ်ပန်း တတည်ငြငြိမ်နန့်ကြည့်လိုက်တေ။ တစိလေ့မမှား ဆံပင်ရှည်မချေ။
“မောင်”……….လတ်။
“ခိုင်”……….ဆိုဝါ။
မြတ်ပန်းရင်ထဲတိမှာလှိုက်လို့လှိုက်လို့တက်လာရေ ငိုချင်စိတ်နန့် အောင့်မိလားရေ စိတ်ကို မနိုင်တနိုင်ထိန်းလိုက်တေ။ထွက်လားခရေ ဒေသူနှစ်ယောက်ကို လှမ်းလို့ကြည့်နီမိစော်……….ရပ်နီရေခြီထောက်တိ ညောင်းမှန်းမသိ။
“သူ”………
မြတ်ပန်း“သူ” ကိုတွီ့ရေ ညစာတိုင်းမှာ သူ့ဘေးမှာဆံပင်ရှည်နန့် ကာလာချေတယောက်အမြဲတမ်းဟိနီရေ။ မြတ်ပန်းလေ့…..ဒေကာလာချေပိုင် လှခဖို့ဆိုကေ၀ါ………………။
သူ့ရို့နှစ်ယောက်ပျော်ရွှင်ကတ်ပါစီ။
နက်ဖြန်ခါဒေနီရာကိုလာဖို့မလိုဗျလ်ဆိုရေ အသိနန့်building-11ဖက်ဟိရေ
လမ်းကိုမျက်စိတဆုံးချင်ဆီကြည့်လိုက်မိရေ။ ပြီးကေ..သူ….ထိုင်ခရေ ခုံချေ။ မိုးသောက်ဖက်ထိုင်ရေပုံချေ နန့် ညစာသားကာလာချေနန့် ထိုင်နီရေ ပုံချေကို မှန်းကြည့်လိုက်တေ။
အော်…….ဆင်းမားဖြစ်လို့ကျောင်းပိတ်ဗျလ်။
“မောင်……….မြတ်ပန်း ရင်ခုန်သံတိလေ့သီနီစော်ကြာဗျလ်မနားယေနန်း။” လို့မြတ်ပန်း တတိုးချေရွတ်ဆိုလိုက်မိရေ။ ငြိမ်သက်လားရေ နှလုံးသားတစုံနန့် မြတ်ပန်း တဖြည်းဖြည်းပျောက်ကွယ်လားရေ “မောင် နန့် ခိုင်” ……ကိုငေးကြည့်တွင်း
အတွေးတိထဲမှာ……………………။။
လေးစားမှုတိနန့်
ကျော့ကြာညို(ရခိုင်သမီးပျို)
